Blum თუ GTV - როგორ ვირჩევთ ავეჯის ფურნიტურას

Blum ავსტრიული მწარმოებელია და ავეჯის ფურნიტურაში პრემიუმ სეგმენტს განეკუთვნება. მისი მთავარი მახასიათებელი მოძრაობის ხარისხია: soft-close მექანიზმი კარს ბოლო სანტიმეტრებზე ჩუმად და თანაბრად აჩერებს, ტელესკოპური მიმმართველი კი უჯრას სრულ სიღრმეზე ხსნის ყოველგვარი ჭრიალის გარეშე.

ცალკე აღსანიშნავია ამწევი სისტემები ზედა კარადებისთვის: კარი ვერტიკალურად ზემოთ იწევა და შუალედურ პოზიციაზე ჩერდება, რაც სამზარეულოში მუშაობისას ხელს არ უშლის.

Blum უფრო ძვირია, ვიდრე GTV, და ეს პირდაპირ აისახება პროექტის ბიუჯეტში. ის იმ შემთხვევებში ვირჩევთ, როცა ავეჯი განსაკუთრებით ინტენსიურად გამოიყენება - სამზარეულოში, ბევრი უჯრით, ან როცა ფასადები მძიმეა და მექანიზმზე დატვირთვა მაღალია.

GTV მაღალტექნოლოგიური ფურნიტურის მწარმოებელია, რომელიც იმავე ტიპის გადაწყვეტებს გვთავაზობს უფრო ხელმისაწვდომ ფასად: soft-close ანჯამები, ტელესკოპური მიმმართველები და ამწევი მექანიზმები.

პრაქტიკაში GTV სავსებით საკმარისია პროექტების უმეტესობისთვის - კარადებისთვის, საბავშვო და საოფისე ავეჯისთვის, მისაღების კომპოზიციებისთვის, სადაც უჯრების რაოდენობა და გახსნის სიხშირე სამზარეულოზე ნაკლებია.

სხვაობა Blum-თან ყოველდღიურ გამოყენებაში უფრო ნიუანსურია, ვიდრე კრიტიკული: მოძრაობის „შეგრძნება“ და ხმა ოდნავ განსხვავებულია. სწორედ ამიტომ ორივე ვარიანტს გაზომვისა და პროექტის ეტაპზე განვიხილავთ - რომ ბიუჯეტსა და მოლოდინს შორის შეგნებული არჩევანი გააკეთოთ.

სამზარეულო ყველაზე დატვირთული ზონაა: მძიმე ფასადები, ღრმა უჯრები ქვაბებით, ზედა კარადების ამწევი მექანიზმები. აქ პრემიუმ ფურნიტურაში ჩადებული თანხა ყველაზე მეტად მართლდება.

კარადებში მთავარი დატვირთვა ანჯამებზე მოდის - განსაკუთრებით მაღალ, ჭერამდე მისულ ფასადებზე. აქ გადამწყვეტია ანჯამების რაოდენობის სწორად გათვლა: სწორედ ეს, და არა მხოლოდ ბრენდი, განსაზღვრავს, კარი დროთა განმავლობაში ჩამოეშვება თუ არა.

საბავშვო ავეჯში soft-close მექანიზმებს განსაკუთრებული აზრი აქვს - ისინი თითების მიჭყლეტის რისკს ამცირებს. საოფისე ავეჯსა და რესეფშენში კი მთავარია უჯრების სრული გამოსვლა და ჩასაკეტი სექციები.

საუკეთესო ფურნიტურაც კი ვერ იმუშავებს, თუ არასწორადაა დაყენებული. მონტაჟისას ჩვენი ბრიგადა თითოეულ კარს სამ სიბრტყეში არეგულირებს, რომ ღრეჩოები თანაბარი იყოს და ფასადები ერთ ხაზზე იდგეს.

დროთა განმავლობაში მცირე რეგულირება ნორმაა - განსაკუთრებით ახალ შენობებში, სადაც კონსტრუქცია პირველ წლებში ჯდება. ეს არ არის დეფექტი და მარტივად სწორდება.

ჩვენს ყველა ნაკეთობაზე მოქმედებს 5 წლიანი წერილობითი გარანტია, რომელიც კონსტრუქციასაც ფარავს და ფურნიტურასაც. საგარანტიო შემთხვევაში გამოძახება, დიაგნოსტიკა და შეკეთება უფასოა. სწორედ ამიტომ არ ვმუშაობთ იაფ, უცნობ ფურნიტურასთან: ის ჯერ მომხმარებელს უქმნის პრობლემას, შემდეგ კი ჩვენს გარანტიას.